މިނިސްޓަރ އޮފް ފޮރިން އެފެއާޒް މޫސާ ޒަމީރު، މިއަދު ބަޙްރެއިނަށް ރަސްމީ ދަތުރެއްގައި ވަޑައިގެންފިއެވެ.

މި ދަތުރުފުޅަކީ ބަޙްރެއިންގެ މިނިސްޓަރ އޮފް ފޮރިން އެފެއާޒް ޑރ. އަބްދުއްލަޠީފް ބިން ރަޝީދު އަލް ޒައާނީގެ ދަޢުވަތަކަށް ކުރައްވާ ދަތުރުފުޅެކެވެ.

މިނިސްޓަރ ޒަމީރުގެ މި ދަތުރުފުޅުގައި، ބަޙްރެއިންގެ ފޮރިން މިނިސްޓަރާއެކު މަތީ ފެންވަރުގެ މަޝްވަރާތަކެއް ކުރައްވާނެއެވެ. މި މަޝްވަރާތަކުގައި ދެ ޤައުމުގެ ދެމެދުގައިވާ ދިގު މުއްދަތުގެ ގުޅުން މުރާޖަޢާކުރައްވައި، ދެ ފަރާތަށް ފައިދާހުރި ދާއިރާތަކުން އިތުރަށް އެއްބާރުލުން ދެވިދާނެ ގޮތްތައް ބައްލަވާލައްވާނެކަމަށް ފޮރިން މިނިސްޓްރީން މަޢުލޫމާތު ދެއްވިއެވެ.

މިނިސްޓަރ ޒަމީރު މި ދަތުރުފުޅުގައި ބަޙްރެއިން ސަރުކާރުގެ އެހެނިހެން އިސް ބޭފުޅުންނާވެސް ބައްދަލުކުރައްވާނެއެވެ. މީގެ ތެރޭގައި މިނިސްޓަރ އޮފް ފައިނޭންސް އެންޑް ނޭޝަނަލް އިކޮނޮމީ، މިނިސްޓަރ އޮފް އޮއިލް އެންޑް އެންވަޔަރަންމަންޓް އަދި މިނިސްޓަރ އޮފް ޓޫރިޒަމް ހިމެނެއެވެ. މި ބައްދަލުވުންތަކުގައި ދެ ޤައުމުގެ ދެމެދުގައި އެކި ދާއިރާތަކުން އެއްބާރުލުން އިތުރުކުރެވިދާނެ ގޮތްތަކާ ބެހޭގޮތުން މަޝްވަރާކުރައްވާނެއެވެ.

މި ދަތުރުފުޅުގައި މިނިސްޓަރ ޒަމީރުގެ އަރިހުގައި އެމްބެސެޑަރ އެޓް ލާޖް އަޙްމަދު ނަޞީރު، ސެކްރެޓަރީ، ބައިލެޓަރަލް، ޑރ. ހަލާ ޙަމީދު، ޖޮއިންޓް ސެކްރެޓަރީ މަރްޔަމް ރީޝާ އަދި އެސިސްޓެންޓް ޑިރެކްޓަރ މިޒްނާ ވަޙީދު ބައިވެރިވެވަޑައިގަންނަވައެވެ.

މިއަހަރަކީ ދިވެހިރާއްޖެއާއި ބަޙްރެއިނާ ދެމެދު ޑިޕްލޮމެޓިކް ގުޅުން ޤާއިމުކުރިތާ 44 އަހަރު ފުރޭ އަހަރެވެ.