"އޮފީހުގެ ވަޒީފާގައި އުޅުނުއިރު އަޅުގަނޑަށް ޖިންސީގޯނާކުރަން މަސައްކަތްކުރި ވެރިން އެމީހުންގެ އަނބިންނާއިއެކު ބާޒާރުކުރަން (އަޅުގަނޑުގެ ފިހާރަތަކަށް) އައުދެއެވެ. ފެނުނު ނަމަވެސް "އައްސަލާމް ޢަލައިކުމް" ބުނުން ނޫން ބަހެއް ނުބުނަމެވެ. އެއްދުވަހަކު އަޅުގަނޑުގެ އެއިރުގެ ވެރިއަކު "މަސައްކަތްފެށީ ކިހިނަކުންތޯ؟" ސުވާލުކުރީމާ ބުނީމެވެ. "އަނިޔާވެރި ވެރިންގެ ބިރުދެއްކުމަށާ އިބިލީހުގެ ވަސްވާހަށް ނުހެއްލުނީމާ ﷲ ލެއްވެވި ރަޙްމަތުންނެވެ."  

މިއީ ހަމަ ތިރީގައިވާ ވާހަކައިގެ ޕެރެގްރާފެކެވެ. ހިތްވަރުގަދަ އަންހެންކުއްޖާގެ ޖަވާބުގެ ބުރަދަން ބޮޑުކަމުން ހާމަކޮށްލީއެވެ. މުޅިވާހަކައަކީ ވެސް ޢިބްރަތުން ފުރިގެންވާ ވާހަކައެކެވެ.  

އަޅުގަނޑަކީ ސަރުކާރުގެ ކުންފުންޏެއްގައި ވަޒީފާއަދާކުރަމުން އައި އަންހެނަކީމެވެ. ބައެއް ވެރިންގެ ދިމާކުރުންތަކާއިހުރެ ވަރަށް ދަތިއުނދަގޫ ޙާލަތުތައް ކުރިމަތިވިއެވެ. ކަންކަން ބޮޑުވަމުން އައިސް އެތަނުގައި މަސައްކަތްނުކުރެވޭ ޙާލަތަށް ދިއުމުން ނުބައި ބަދުނާމެއް އަޅުވާފައި ވަކިކުރުމުގެ ކުރިން އަމިއްލައަށް އިސްތިޢުފާ ދިނީމެވެ.  

އަޅުގަނޑަކީ އެންމެ ކުޑައިރުންސުރެ އަލަތު ފިރިމީހާއާއިއެކު ނޫނީ އެއްވެސް ގުޅުމެއް ނުހިންގަން ޢަޒުމް ކަނޑައަޅައި އެކަން އެގޮތަށް ހިންމަވައިދެއްވެވުން އެދި ދުޢާކުރަމުން އައި އަންހެނަކީމެވެ. އެހެންވެ އަޅުގަނޑުގެ ގައިގައި ބީހެވުނު ހިލޭ ފިރިހެނަކު ނުހުންނާނެއެވެ. ވީމާ ﷲ އަޅުގަނޑަށް ހެޔޮ ގޮތް އިރާދަކުރައްވަވާނެ ކަމުގެ ފުރިހަމަ ޔަޤީންކަން އަބަދުވެސް އޮވެއެވެ.  

އަޅުގަނޑުގެ މަންމައަކީ ބަލިވެ އެނދުގައި އޮންނަން ޖެހިފައިވާ މީހެކެވެ. އަޅުގަނޑަށް މުސާރަނުލިބުމަކީ މަންމައަށް ބޭނުންވާ ކަންކަން ކޮށްދޭން ހުރަސްއެޅޭނެ ކަމެއްކަން އެނގިހުރެވެސް އިސްތިޢުފާދިނީ ދެން އެހެން ގޮތެއް ނެތުމުންނެވެ. އިސްތިޚާރާވެސް ކޮށްފައެވެ. އަދި ކެނޑިނޭޅި ދިއައީ ހެޔޮ ރަޙްމަތް ލެއްވެވުން އެދި ދުޢާކުރަމުންނެވެ. އެޙާލުގައި އޮވެގެންވެސް މަންމަވެސް އަޅުގަނޑަށް ދުޢާކޮށްދެއެވެ.

ތަނަވަސް ބޮޑުބޭބެއެއް ހުރެއެވެ. ބޮޑުބޭބެ މަންމަ ދެކެލަން އައިދުވަހަކު އަޅުގަނޑުގެ ވަޒީފާގެ ކަންކަން ކިހިނެއްތޯ މުސާރައަށް މިހާރު ކިހައިވަރެއް ލިބޭތޯ ސުވާލުކުރުމުން ކަންކަން ހިނގައިދިއަގޮތް ވަރަށް ރަނގަޅަށް ކިޔައިދިނީމެވެ. އަޅުގަނޑުގެ ވާހަކަތައް އަޑުއަހާފައި ބޮޑުބޭބެ ބުންޏެވެ. "އެހެންވީމާ މިދިއަމަހުގެ މުސާރަވެސް ލިބޭނެތާއެވެ. ދެން އެއްވެސް މީހެއްގެ ނޯކިރީކުރަން ނުއުޅޭށެވެ. ބޮޑުބޭބެ މިދޭ ފައިސާއިން އަމިއްލަ މަސައްކަތެއް ފަށާށެވެ. އެމަސައްކަތުގައި ކުރިއަރައިގޮސް އަމިއްލަ ފައިމައްޗަށް ތެދުވެވެންދެން އޮފީހުން ލިބުނުވަރަށް ކޮންމެ މަހަކުވެސް ބޮޑުބޭބެ މުސާރަދޭނަމެވެ. މަންމައަށް ހެޔޮކޮށް ހިތައި މަންމަ ބަލަހައްޓަމުން ގެންދާށެވެ. ބޮޑުބެއަށް އުޅެންޖެހޭ ގޮތުން ގިނައިން ނާދެވެނީއެވެ. ނަމަވެސް ކަމަކު ބޭނުންވެއްޖެ ނަމަ ގުޅައިލާށެވެ. ކަނބުލޮގެ އެކައުންޓް ނަމްބަރު ބޮޑުބެއަށް ފޮނުވައިލާށެވެ. އެހެން ބުނެފައި ބޮޑުބޭބެ ދިއައީއެވެ.  

އަޅުގަނޑު ކިޔެވީ ވިޔަފާރީގެދާއިރާއިން ކަމަށްވުމުން ކުރިއަށްދާން ފަސޭހަވާނީ އެދާއިރާއިން ކަމަށްވުމުން ބޮޑުބޭބެގެ އެހީތެރިކަމާއިއެކު އަޅުގަނޑު ފިހާރައެއް ހުޅުވީމެވެ. ވިއްކަންފެށީ އަންހެނުންނަށް ބޭނުންވާނެ އެއްޗެއްސާއި ފޭރާމެވެ. އިރާދަފުޅުން އަހަރެއްހައި ދުވަހުގެ ތެރޭގައި ރަނގަޅު ފައިދާއެއް ލިބެން ފަށައިފިއެވެ. 7 އަހަރުވީއިރު މިހާރު 3 ފިހާރައެބަހުއްޓެވެ! ފަހާތަނުގެ 2 ތަން އެބަހިންގަމެވެ. އިން ޝާ ﷲ  

އޮފީހުގައި އަޅުގަނޑަށް ޖިންސީގޯނާކުރަން މަސައްކަތްކުރި ވެރިން އެމީހުންގެ އަނބިންނާއިއެކު ބާޒާރުކުރަންވެސް އައުދެއެވެ. ފެނުނު ނަމަވެސް "އައްސަލާމް ޢަލައިކުމް" ބުނުން ނޫން ބަހެއް ނުބުނަމެވެ. އެއްދުވަހަކު އަޅުގަނޑުގެ އެއިރުގެ ވެރިއަކު "މަސައްކަތްފެށީ ކިހިނަކުންތޯ؟" ސުވާލުކުރީމާ ބުނީމެވެ. "އަނިޔާވެރި ވެރިންގެ ބިރުދެއްކުމަށާ އިބިލީހުގެ ވަސްވާހަށް ނުހެއްލުނީމާ ﷲ ލެއްވެވި ރަޙްމަތުންނެވެ."  

މިއީ އަޅުގަނޑުގެ ޙަޔާތުގައި ކަންކަން ދިމާވި ގޮތެވެ! މިއަދުނޫހުގެ ކިޔުންތެރިންނަށް، ޚާއްޞަކޮށް އަންހެން ބޭފުޅުންނަށް ބުނެލަން އޮތީ ސަލާން ޖަހަން ޖެހުނަސް ﷲ ޙަރާމް ކުރެއްވެވި ކަމެއް ނުކުރާށެވެ! އެއިރުން ﷲ ލައްވަވާ ރަޙްމަތް މާބޮޑުވާނެއެވެ.  

- އަޒްލިފާ / މިއަދުނޫހުގެ ކިޔުންތެރިއެއް