އިއްޔެއަކީ މި ފަހުގެ ތާރީޚެއްގައި މާލެ ސަރަހައްދުގައި އެންމެ ގިނަ ޒުވާން ޚަތީބުން އިމާމުވެ ހުކުރު ކުރި ދުވަސްކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިކަމާ ގުޅިގެން ޑރ. ޝަހީމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، އިއްޔެއަކީ މި ފަހުގެ ތާރީހެއްގައި މާލެ ސަރަހައްދުގައި އެންމެ ގިނަ ޒުވާން ޙަތީބުން އިމާމުވެ ހުކުރު ކުރި ދުވަސް ކަމަށާއި މި ޒުވާން ހަތީބުންނަކީ ސަރުކާރުން ވޭތުވެދިޔަ ދުވަސްތަކުގައި ކުރިއަށް ގެންދެވި ހަތީބުން ތަމްރީނުކުރުމުގެ ޚާއްޞަ ޕްރޮގްރާމު ފުރިހަމަކޮށްފައިވާ ދަރިވަރުންކަމަށެވެ.

އިއްޔެ މާލެ ސަރަހައްދުގެ 12 މިސްކިތެއްގައި މި ޒުވާން ޚަތީބުން އިމާމުވެ ހުކުރު ކޮށްފައިވެއެވެ. މި މިސްކިތްތަކުގެ ތެރޭގައި މަސްޖިދު މުޙައްމަދު، މަސްޖިދު އަމީލް ޖަލީލް، މަސްޖިދު ޢުޘްމާން، މަސްޖިދު ސަލާމް، މަސްޖިދްޖިދު ޙަސަން އާދަމް، މަސްޖިދުލް އަޞްދިޤާ، މަސްޖިދުއް ސުލްޠާން ޙަސަން ޢިއްޒުއްދީން، މަސްޖިދު އިސްކަންދަރު، މަސްޖިދުލް ޖަލާލުއްދީން، މަސްޖިދުލް ފުރްޤާން، މަސްޖިދުއްސުލްޠާން މުޙައްމަދު ބިން ޢަބްދުﷲ އަދި މަސްޖިދުއް ނޫރު ހިމެނެއެވެ.

ޒުވާން ޚަތީބު ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރު ކުރުމުގެ ހުއްދަ ދިނުމަށް ކުރިއަށްގެންދާ ޕްރޮގްރާމެކެވެ.

މި ޕްރޮގްރާމުގެ ސަބަބުން ޒުވާނުންނަށް ދީނީ ޢިލްމު އުނގެނުމަށާއި މުޖުތަމަޢުގައި ޒިންމާދާރު ދައުރެއް އަދާކުރުމަށް މަގުފަހިވެގެންދާނެ ކަމަށް ބެލެވެއެވެ.

މި ޕްރޮގްރާމުގެ ކާމިޔާބީއާއެކު، ކުރިއަށް އޮތް ތަނުގައި އިތުރު ޒުވާން ޚަތީބުން ތަމްރީނުކޮށް، ރާއްޖޭގެ އެކި ކަންކޮޅުތަކުގައި ހުރި މިސްކިތްތަކުގައި ހުކުރު ކުރުމުގެ ފުރުޞަތު ލިބިގެންދާނެ ކަމަށް އުންމީދު ކުރެވެއެވެ.

Mi'adhaki mi fahuge thaareekheh ga Male sarahadhuga emme gina Zuvaan Khatheebun Imaamuve hukuru kuri dhuvaheh. Mi emmehaa kudhinaki Zuvaan Khatheeb Programun Thamreen hoadhai Sanadhu haasil kuri kudhin. Alhamdhu Lillah. https://t.co/mlcFJHxWaD

— Mohamed Shaheem Ali Saeed (@Mohamedshaheem1) September 6, 2024