ގދ.ތިނަދޫއަށް އުފަން އަޒީޒާ އަފީފް އަކީ އުމުރުން 12 އަހަރުން ފެށިގެން ހާއްސައެހީއަށް ބޭނުންވާ މީހަކެވެ. އަޒީޒާގެ ބައްޔަކީ ސެޕާސްޓިކް ޕެރެޕްލީޖިއާ އެވެ. އުމުރުން 12 އަހަރުގައި އެހެންކުދިންނެކޭ އެއްފަދައިން ސްކޫލުގައި ތައުލީމް ހާސިލްކުރަމުންދަނިކޮށް އައި ހުމެއްގެ ސަބަބުން ފައިގެ ނާރު ކުރުވެ ހިނގަން އުދަގޫވާންފެށިއެވެ. ދުވަހެއް ދުވަހެއް ފައި ސަކަރާތްވެ އެންމެ ފަހުން އެއްވެސް ގޮތަކަށް ނުހިގި، އެކަނި ފާޙާނާއަށްވެސް ނުދެވި އިނދެވުނީއެވެ. ތައުލީމީ ހަޔާތް ހޭދަކޮށްފައިވަނީ ވީލް ޗެއާއެއްގައެވެ.

މިގޮތުގައި އެތައް އަހަރެއް ފާއިތުވެ ދިޔައީ ނާއުއްމީދުގައެވެ. އެހެންނަމަވެސް 2003 ވަނަ އަހަރު ކުރެވުނު އޮޕަރޭޝަނެއްގެ ސަބަބުން އަޒީޒާގެ އުއްމީދުގެ ހުޅުކޮޅު ދިއްލުނެވެ. ވީލް ޗެއާއިން ތެދުވެވި އަމިއްލަ ފައި މައްޗަށް ކޮޅަށް ތެދުވެވުނެވެ. އެހެންނަމަވެސް ޑޮކްޓަރުގެ ލަފާގެ މަތިން އޭނާއަށް ދޭންޖެހޭ ފަރުވާ ނުލިބުމުގެ ސަބަބުން ފައި މިހާރު ދަނީ ސަކަރާތްވަމުންނެވެ. އޮޕަރޭޝަނަށްފަހު އަސާއެއްގެ އެހީގައި އަޒީޒާ އެކަނި ހިނގާބިނގާ އުޅެއެވެ. ނަމަވެސް ބޭސްފަރުވާއެއް ނުކުރެވި ގިނަ ދުވަސްވުމުން އަނެއްކާވެސް ފައި އިތުރަށް ގޯސްވެ ހިނގާއިރު އެއްކޮށް ފައތިލަވެސް ނޭޅެއެވެ. އަސާއެއްގެ އެހީގައިވެސް މިހާރު ހިނގާބިނގާ އުޅެން އުދަގުލެވެ. އަސާއެއް ބޭނުންކުރިޔަސް ދުރު ތަންތަނަށް ދާއިރު އިތުރު އެހީތެރިއެއް ބޭނުންވެއެވެ.

ޒަވާޖީ ހަޔާތެއް ފަށައިގެން އިންޝާﷲ ވަރަށް އުފަލުގައި އުޅެމުން އައި ނަމަވެސް ދިރިއުޅުމުގައި ހުސްކަމެއް އެބައޮތެވެ. އެއީ އޭނާއަށް މަންމާއޭ ކިޔާ ގޮވާލާނެ ދަރިއެކެވެ. ގައިނީ މައްސަލަ ތަކެއް ހުރުމާއި ގުޅިގެން ދަރިޔެއް ހޯދުމަށް އޮތް ހަމައެކަނި ގޮތަކީ އައިވީއެފް ހެދުމެވެ. އައިވިއެފް ހެދުމުން ދަރިއެއް ލިބޭނެ ކަމުގެ އުއްމީދު ޑޮކްޓަރުން ވަނީ ދީފައެވެ.

ފައިގެ މައްސަލަ އަދި ގައިނީ މައްސަލައިގައި މިހާތަނަށް ވަރަށް ގިނަ ޑޮކްޓަރުންނަށް ދައްކާ ވަރަށް ގިނަ މަސައްކަތް އަޒީޒާ ވަނީ ކޮށްފައެވެ. އެގޮތުން ދާދި ފަހުން ރާއްޖެއިން ބޭރުގެ ޑޮކްޓަރަކާއި އޮންލައިންކޮށް ގުޅައިގެން ވާހަކަ ދެއްކުމުން ފަޔަށް އެކޮޅުން ބޭސް ކުރުމުން ރަނގަޅުވާނެ ކަމަށާއި އެކޮޅުގައި ބޭސް ފަރުވާއަށް އެއް މަސްދުވަހު މަޑުކުރަން ޖެހޭނެ ކަމަށްވެސް ޑޮކްޓަރު ވަނީ ބުނެފައެވެ. ފައިގެ އޮޕަރޭޝަން ކުރި ފަހުން އެދެވޭ ފަރުވާއެއް އަޒީޒާއަށް ލިބިފައިނުވެއެވެ. އަދި ޑޮކްޓަރަށް ދެއްކުމަށް ރާއްޖެއިން ބޭރަށް ދާން އެންސްޕާއިން ވަނީ އެހީތެރިކަން ފޯރުކޮށްދީފައެވެ. ނަމަވެސް މާލީ ހާލަތު ދަށްވުމުގެ ސަބަބުން އަޅުގަނޑުގެ ބައްޔަށް ފަރުވާއެއް ލިބޭގޮތެއް އަދި ވަނީ ނުވެފައެވެ. ބޭސްފަރުވާއަށް ރާއްޖެއިން ބޭރަށް ގޮސް ހުރުމާއި ކެއިން ބުއިން އަދި އެހެނިހެން ޚަރަދުތައް ކުރަން ޖެހޭތީ އާއި ގިނަ ދުވަހު އެކޮޅުގައި މަޑުކުރަން ޖެހޭތީ އަޒިޒާ އެދެނީ އާންމުންގެ ދީލަތި އެހީއަކަށެވެ. މިވަގުތު މާލީ ހާލަތު ހުރިގޮތުން ބޭސްފަރުވާއަށް ރާއްޖެއިން ބޭރަށް ދާން ތަންނުދެއެވެ.

ގުޅޭނެ ނަމްބަރު: 9415544 (އަޒީޒާ އަފީފް)

އެކައުންޓް ނަމްބަރު: ބީއެމްއެލް ދިވެހި ( 7710413307101 ) އަޒީޒާ އަފީފް.

އެކައުންޓް ނަމްބަރު: ބީއެމްއެލް ޑޮލަރު ( 7730000602041 ) އަޒީޒާ އަފީފް.