ތަނަވަސް ދިރިއުޅުމެއް އުޅެމުން އަންނަ ފިރިހެނަކާއި ޒުވާން އަންހެނަކާއި ދެމީހުން ބައްދަލުވިއެވެ. މަޝްހޫރު ހޮޓަލަކަށް ވަންނަންވެގެން ކާރުން ފެއިބިތަނުންނެވެ. ފިރިހެން މީހާގެ ޢުމުރަށްވެސް ބަލައިލުމެއް ނެތި އަންހެންމީހާ އަވަސްވެގަތީ އޭނާގެ ރީތިކަމަށް ތަޢްރީފްކުރާށެވެ. ތަޢްރީފްކުރަމުންގޮސް ނުދައްކާ ވާހަކައެއް ނެތެވެ. 

"ކަލޭގެ ސަމާލުކަމަށް އަހަރެން ނައި ނަމަވެސް އަހަރެން ކަލޭގެ ފަހަތުން ހިނގާތާ ކިތަންމެ ދުވަހެކެވެ. މިރޭ މިހޮޓަލަށް އައީވެސް ހަމަ ކަލެއާއި ބައްދަލުވެވާހަކަދައްކައިލެވޭތޯއެވެ! މިހޮޓަލަށް ރޭގަނޑު ވަރަށް ގިނައިން ކަލޭ ވަދެ ނުކުމެ ހަދާތަން ފެންނާތީ ވަށައިގެން އެނބުރޭތާ ކިތަންމެ ދުވަހެކެވެ." 

ފިރިހެންމީހާ އޭނާގެ އަވާގައި ޖެހި ގުޅުން އުފެއްދިއެވެ. ލޯބިވެގެން ދެމީހުން އުޅޭތާ އެތައް ދުވަހެއްވެ ކައިވެނިކުރަން ތައޔާރުވެފައިވަނިކޮށް އަންހެންމީހާގެ ފިރިމީހާ އެފިރިހެންމީހާ އާއި ބައްދަލުކޮށްފައި ބުންޏެވެ. "ތިއަކުރަންއުޅޭ ކައިވެނިކުރުމުގެ ކުރިން އަޑުއަހައިލުން ރަނގަޅުވާނެއެވެ. ތިއަ އަންހެނަކީ އަހަރެންގެ އަނބިމީހާއެވެ. ނުކުޅެދުންތެރިކަންހުރި ދަރިއަކުވެސް ވަނީ ލިބިފައެވެ. 

ކައިވެނިކުރީންސުރެ އޭނާ ޝަކުވާކުރަމުން އައީ އަހަރެންގެ ތަނަވަސްކަން ނެތުމުންނެވެ. ތަނަވަސް މީހަކާއި ބައްދަލުވުމުން އޭނާ އަހަރެމެން ދޫކޮށްލީއެވެ. އޭނާ ދިއުމަކުން އަހަރެން ކަންބޮޑެއް ނުވަމެވެ. އަހަރެންނާއި އަދިވެސް އަހަރެންގެ ފެންވަރުން ކައިވެނިކުރާނެ މީހަކު ލިބިދާނެއެވެ. އަހަރެން ދެރަވަނީ އޭނާ އާއި ކަލޭފަދަ ތަނަވަސް މީހަކު ކައިވެނިކޮށްފިނަމަ، ކައިވެނިކުރުމަށްފަހު ކަލެއަށް ދިފާނެ ދެރައަކާއިމެދުގައެވެ." 

އޭނާ ގޮސްހުރި ދަރިފުޅުވެސް ގޮވައިގެންނެވެ. އެހެންވެ ތަނަވަސްމީހާގެ ހިތަށް ވަރަށް އަސަރުކުރިއެވެ. އަދި އެއަންހެންމީހާގެ ހުރި ދަހިވެތިކަންބޮޑުކަން ވިސްނުނެވެ. އެފަދަ ބަލި ދަރިއަކު އެއްލާލަން ކެރުނީތީ ޙައިރާންވިއެވެ. 

ތަނަވަސްމީހާ ބުންޏެވެ. "އހަރެން މިދޭ ފައިސާގެ ބޭނުންހިފައި ތަނަވަހުގައި އުޅޭށެވެ. ރަނގަޅަށް ދަރިފުޅުގެ ކަންކަން ބަލަހައްޓާށެވެ. އަހަރެން ފަހުން ކަލެއަށް ވަޒީފާއެއްވެސް ހަމަޖައްސައިދޭނަމެވެ. ކަލޭގެ އަނބިމީހާއަކީ ކައިވެނިކޮށްގެންހުރި އަންހެނެއްކަން ނުއެނގި މިހާރުވަނީ ކައިވެނިކުރަންވެސް ނިންމިފައެވެ. މާދަންރޭ ހިލްޓަންގައި ކައިވެނިކުރަން ރަސްމިއްޔާތު ބާއްވަން ހުރިހާކަމެއް ވަނީ ހަމަޖެއްސިފައެވެ. 8 ޖަހާއިރު ދަރިފުޅު ގޮވައިގެން ކައިވެނީގެ ރަސްމިއްޔާތަށް އަންނާށެވެ." 

ކައިވެނީގެ ރަސްމިއްޔާތު ފެށުމާއިއެކު ތަނަވަސްމީހާ މައިކުން ބުންޏެވެ. "މިރަސްމިއްޔާތަށް ވަރަށް ޚާއްޞަ ދެމެހްމާނަކު ދާދި ދެންމެއަކު އަތުވެއްޖެއެވެ. އެމީހުން ކޮބައިހެއްޔެވެ؟" ބުނާއިރަށް ދަރިފުޅު ކޮނޑަށްލައިގެން ބައްޕަ ކުރިއަށް ޖެހިލުމުން އޭނާ ބުންޏެވެ. "ކުރަން އުޅުނު ކައިވެނީގެ ޙަފްލާގައި އިޢުލާނުކުރަން މިޖެހެނީ ބައެއް އަންހެނުންގެ ހުންނަ ނުބައި ނުލަފާކަމެވެ. ހަޤީޤަތް ނުއެނގިހުރެ އަހަރެންނަށް ކައިވެނިކުރަން މިއުޅެވުނީ މިމީހާގެ އަނބިމީހާ އާއިއެވެ. މި ބަލިދަރިފުޅުގެ މަންމަ އާއިއެވެ. ކައިވެނި ނުވެސްކުރާކަމަށް ހެދިގެން އަހަރެން މަޅީގައި ޖެއްސުވި އަންހެންމީހާއާއިއެވެ. 

އެހެންވީމާ ކުރަން އުޅެވުނު ކައިވެނީގެ ހުރިހާ ކަމެއް ބަދަލުކޮށްފީމެވެ. އަހުރެން މިގުޅުނީ ކައިވެނިކުރަން އުޅެވުނު މިހިރަ އަންހެންމީހާގެ ފިރިމީހާއާއި އޭނާގެ ދަރިފުޅާއިއެވެ. މިގުޅުމުގެތެރެއިން އެދެބަފައިންނަށް ދިރިއުޅޭނެ ގެއަކާއި އަހަރެންގެ ކުންފުނިން ރަނގަޅު ވަޒީފާއެއް ލިބޭނެއެވެ. މިދަރިފުޅަކީ އަހަރެންގެ ދަރިއެއްގެ ގޮތުގައި ހުރިހާ ޚަރަދެއްކޮށްގެން ބަލަހައްޓާނަމެވެ. އަންނަ ހަފްތާގެ މިރޭގެ މިގަޑީގައި އަހަރެމެން ދެއަޚުން ދެ އަންހެނުންނާއި ކައިވެނިކުރުމުގެ ރަސްމިއްޔާތުވެސް އޮންނާނެއެވެ. މިހާރު މިތަނުގައި ތިބި އެންމެންނަށް އިތުރު ދަޢުވަތެއް ނުދެވޭނެއެވެ. ދަޢުވަތު ދީމިނިމުނީއެވެ. ވަކިން ޚާއްޞަ ދަޢުވަތެއް އަހަރެން މިރޭ ކައިވެނިކުރަން އުޅުނު ހިތެއް ނެތް، އަނިޔާވެރި މަކަރުވެރިޔާއަށް ދެމެވެ. މިހިސާބުން އެންމެންވެސް ކައިގެން މިރޭ ގެއަށްދާށެވެ."   

އެއަންހެންމީހާއަށް އެއްޗެތިގޮވާއަޑުން މުޅި ހޯލްގުގުމައިލިއެވެ. އެތަނުން އޭނާ ފިލަން އުޅުމުން ބައަކު ގޮސް އޭނާ އުފުލައި އެންމެންނަށް ދައްކައި އިޝްތިހާރުވެސް ކުރިއެވެ.  

ޙަފްލާ ނިމިގެން ގެއަށްދިއައިރު އަނބިމީހާ ހުރީ މާކުރިން ގޮސް ގޭދޮރުމަތީގައެވެ. ކާރުން ފޭބިތަނުން މާފަށް އެދި އާދޭސްކުރަން ފަށައިފިއެވެ. ފިރިމީހާއަށް ބޮޑު މުސާރައެއްލިބޭ ވަޒީފާއަކާއި ދިރިއުޅޭނެ ރަނގަޅު ފެންވަރުގެ ގެއެއް ލިބެން އުޅޭތީ އެކަމުގެ ދަހިވެތިކަމުގައި ފިރިމީހާގެ ދެފައިމައްޗަށް ތިރިވެ ސަލާން ޖަހައި އާދޭސްކުރިއެވެ. ނަމަވެސް އެއިން އެއްވެސް ވާހަކައެއް އަޑުއިވުނުކަމަށްވެސް ފިރިމީހާ ނުހެދިއެވެ. ގެއަށް ވަނަނުދީ ގެތަޅުލީއެވެ.

މިއީ އަޅުގަނޑު ބަލާފައިވާ ފިލްމެއްގެ ކުރު ޚުލާޞާއެކެވެ. މަކަރުވެރި، ދަހިވެތި އަންހެނުންނާއި ފިރިހެނުން ދުނިޔޭގައި އުޅެއެވެ. ބައެއް މީހުންގެ ކަންކަން ވަނީ ތަޖުރިބާވެސް ކުރެވިފައެވެ. މިއީދެން ތަންކޮޅެއް ބޮޑުވަރުކަމަށް ޤަބޫލުކުރަންޖެހެއެވެ.

ދެން އަޅުގަނޑަށް ފާހަގަކުރެވުނީ އަނބިމީހާގެ ނުބައިކަން އެވަރަށް ބޮޑުވިކަމުން ފިރިމީހާއަށް ލިބުނު ބޮޑު ފައިދާއެވެ. ފަޤީރު ދިރިއުޅުމެއް އުޅެމުން އައި މީހަކަށް ބޮޑު ތަނަވަސްކަމެއް ލިބުނީއެވެ. އަޚެއްގެ ގޮތުގައި މިލިއަނަރަކުވެސް ލިބުނީއެވެ. ބަލިދަރިފުޅުގެ ހުރިހާ ކަންކަން ބަލަހައްޓައިދޭނެ މީހަކުވެސް ލިބުނީއެވެ.

އަޅުގަނޑަށް ވިސްނުނީ މިފަދައިން ބޭވަފާތެރިވާ ފިރިންގެ އަނބިންނަށްވެސް ހަމަ ﷲ މިފަދަ ނިޢްމަތްތައް މިންވަރުކުރައްވަވާނެ ކަމެވެ. އެހައި ފަސޭހައިން ވަޤުތުން ނުލިބުނަސް ލިބޭނެ ކަމެވެ. ލިބެމުންދާ އަނިޔާ ދެކެދެވޮޑިގެންވާ ﷲ އެއްވެސް އިންސާނަކު ނިކަމެތިވާން ދޫކޮށް ނުލައްވަވާނެ ކަމެވެ.

މިއަދުނޫހުގެ ކިޔުންތެރިންނަށް ޢިބްރަތްތެރި ފިލާވަޅަކަށްވާނެ ކަމަށް އުންމީދުކުރަމެވެ.

- އިޙްޞާނާ / މިއަދުނޫހުގެ ކިޔުންތެރިއެއް